كراسى موسيقية
إيدى على قلبى يكسب فى لعبة الكراسى الموسيقية
فٍل
او يكسب اخوانى عايز يسيطر على سياسة الكل
خايف الموسيقى تخلص و تنزل النهاية
!و يقعد عالكرسى واحد منهم .. و اتشل
إيدى على قلبى يكسب فى لعبة الكراسى الموسيقية
فٍل
او يكسب اخوانى عايز يسيطر على سياسة الكل
خايف الموسيقى تخلص و تنزل النهاية
!و يقعد عالكرسى واحد منهم .. و اتشل
يا اللى هاتنتخب حد من الفلول
ما تنساش تحط لسانك فى الحبر الفوسفور
بدل صباعك
عشان لما تروح لكل قبر شهيد من دول
تعرف تغيظه كويس
! و تطلعله لسانك
بييب بييييييييب بييييييييب بييييييييييييب
بيقولك هو دة بقى صوت الطريق
كأن كل كلكس بيقول للى جنبه
سيب الاول و انا اسيب
و الزحمة بقت شكل الشوارع
من اول شارع لاخر شارع
و من اول الدائرى لحد المنيب
اما ريحتها بقى
ذى دخان حريقة و لهيب
و صدرها يا عينى محتاج لاقرب طبيب
يكتبلها روشتة يطول عمرها شوية
او يقولنا بصراحة
قدامها فرصة تعيش
!!و لا محتاجة رئة من جديد
تلك اللحظة.. لما تتخرج
و اصحابك يباركولك و الناس تتفرج
و انت واقف مكانك
مانتاش عارف تضحك ؟؟
!و لا تعيط ؟
قالوا عالانسان إن اصله كان شوية حاجات
و ياما طًلًعوا عن اصله شوية نظريات
مرة قرد
مرة نبات
و يمكن بعد كدة يقولوا جنينة حيوانات
بس انا بقول ان اصله كان
شوية شهادات
اول ما بيتولد و اول ما يكلم الدنيا بالعياط
تطلعله شهادة ميلاد
بعدها بشوية يعملوله تحليللات
و يطًلعوله شهادة بالطتعيمات
لما يكبر شوية و يروح المدرسة
يطَلعله ابوه صور لكل الشهادات
و معاهم وصل النور و شوية ضروريات
و فى الآخر يدفع
و ياخد برضو شهادة بالمصروفات
بعدها يكبر اكتر
و يخلَص كل الدراسات
يروح ياخد ورقه و ملف الشهادات
و يبتدى يقدم فى شغل و يملى فى طلبات
و ياخد اعفاء نهائى من الجيش و التكليفات
بعد شوية يتجوز و يمضى على حبة شهادات
و تطلع قسيمة جواز تعلنهم ازواج و زوجات
يكبر اكتر و اكتر و اكتر
و يموت
و يعلنوا موته بحتة ورقة مختومة
و تتملى الدنيا بالسكوت
و يخرج منها ذى ما جه… بشوية شهادات
ميلاد .. تعليم .. جواز و فى الآخر .. شهادة وفيات
يا ترى يا دبلة يا حلوة امتى هالبسك؟
امتى تزينى صباعى و تحرسيه بمحبسك؟
و امتى هالبس فستان جميل
يزَين الكوشة و لا البلالين
و يخلى العريس مش مركز
^^ هايلًبس الشبكة فى الشمال ولا اليمين
” انا يمكن من الناس اللى بيقولوا على كان البيبسى ” كانز
” و بقول برضو “سيتى ستار” على “سيتى ستارز
ذنبى انى معرفش انجليزى؟
ولا ذنبى انى فى بلد اللى فيها يتكلم لغات
يبقى ابن ناس
و اللى يتكلم عربى بس يبقى سواق مكروباظ ؟
هو الفرج معادش ساكن هناك؟
طب غًير كالون الباب أو قفل الشباك ؟
أصلنا ياما صبرنا
و ياما قالوا الصبر مفتاح الفرج
العيب فى اللى قالوا
ولا احنا اللى معانا المفتاح الغلط؟
يا شارة سودا فارقينا بقى
ليه مش عايزة تنزلى و على طول متعلقة
كل ما نيجى نقرب نشيلك
تفضلى متنحة و مبرقة
كأن مكتوب عليكى ان فى كل بيوتنا
تفضلى على حيطانا متلزقة
!!
الوان ضحكتى كتير و مالهاش أد
بتبقى حمرا لما اضحك من قلبى و تلون لون الخد
و بتبقى صفرا لما اضحك و اجبر بخاطر حد
و بتبقى لون البحر بعد كل جزر و مد
و بتبقى سادة من غير لون
لو ضحكة على هزار او نكتة اتقلبت بجد
